Birthday Card

E nätti sälber gmachti Karte vo den Arbetskolleege. Der glettischt Kommentaar bi den Unterschriften isch woorschyynlig gsii "You're going down!"

Wembley...

... isch "guet" gsii!!!

Sales Conference

So, ass do wider emoll öbbis neus dinn stoot duen y jetzt aifach das Föteli yynehänggen und der Bricht won y für der Stainlemer aanebrünzlet ha derzue...

Ändi letscht Joor bin y vo mim Arbetgääber (me erinner sich ans Stammsujet vom 2007) do bi de Brytte zum groosse Jooresaafangsdräffe für unseri öbbe 100 Mitarbaiter vo unserem Beraich yyglaade worde. Me isch denn au uffgforderet worde, sich für d Oobetaläntveraastaltig aazmälde. Dört giengs halt im Stil vome Bunten Oobe drum, e Darbietig uffs Parkett z leege. Der Gwünner krieg denn derfür au e Daag frey.

„Jä guet“, het sich der Tülli do dänngt. „Als Fäärläberli het me jo mit so Züüg Erfaarig und well me jo eh nit ans Intärne ka…“. Schnäll und ooni grooss z überleege het me drum d Aamäldig für d Wältpremiere vo „Brit Basel Carnival Bits“ ussgfüllt und im Büro grooss ummeproleetet die Sach sig scho zu myne Gunschten entschiide.

Bime Haimeturlaub het me denn rasch d Mänätscher-Aaffelaarven yypaagt und flyyssig e baar Noote zunere Kombination uss Versatzstück vom Arabi, de Duudelvärs, de Brytten undem Scotland the Brave zämmegschnipslet. So in der Wuche vorhär het me denn au langsam s Piccolo ind Hand gnoo unds bereut, ass me scho allne gsait het ass me die Nummere wird duurezie, nämmlig.

Am Oobe sälber isch me denn erschte gegene Schluss draa gsii. Wo denn do Lüt aagfange hänn stepptanze, irischi Waisen uff der Muulgyyge spiile, vo ganzem Härzen e Walyysisch Liebeslied singen und e saggstarggen unternäämenskritische Sketch basierend ufem „doote Babbegai“ vo Monty Python zum Beschte z gää het me denn realisiert „verglemmi, die maischten andere maine das jo wirgligg ärnscht“!

Me isch denn enstsprächend miteme mulmige Gfüül hinter d Büüni gschlichen und der Moderaator het welle wüsse wie me denn my Kaibe Noochnamme richtig sait. „Mache mers doch aifach, loss es aifach wäg und saisch aifach „jetzt kunnt der verruggt Aff“. So het denn d Ironie vo der Gschicht wellen ass men imenen „anonyme“ Novartopolis Goschdüm uffere Novartopolis Büüni gstanden isch. D Mängi het gjoolt und aagfange mitklatsche. Sy isch denn amme bitz drusskeit wenn's bim Protagonischt bitz gholperet het. Aber der Aasatz isch no klaar gsii (das glaub y zimndescht bis y s Video gsee). Bim Scotland the Brave undem God Save the Queen isch denn sogar no mitgsunge worden und die wo gwüsst hänn wärs gsii isch hänn mer sogar no gratuliert. Y bi numme no froo gsii asses verbyy isch - dasch jedefalls uffryybender als sich ammen Offizielle vor lutter Fremde z blamiere!

Ganz verschwitzt isch me denn ins Fulham Shirt gschlüpft um sich die folgende Kommentäär aazloose:

· „Hesch der die Massggen äggstra kauft? Wie lang hesch die scho?“

· „Das muess e zimligs Schyssgfüül gsii syy wod gmerggt hesch ass alli andere wirgligg öbbis könne, gäll?!“.

· „Waisch, y find de hesch vor allem Aier mit DÄM wirgligg uff die Büüni z stoo“

Aber mir isch das Wurscht gsii. Y ha d Fasnacht unwürdig verdätten aber immerhin doch verdrätten und däm „Basler Unternämme“ näbem Baslerstaab uffem stillen Örtli non e wytter Stügg vo Basel versuecht nööcher z bringe. Do verstoot mes denn au als Komplimänt wenn aim die hööchere Chargen saage me sig e „bloody nutcase“ und aim au der Kanoneschorsch als erschts mitem (Zitat) Flöötlen uffziet.

Es blyybt somit ainzig no z hoffen ass der Peterli nie d Videouffzaichnig vo däm Uffdritt ind Finger kriegt.

BTW: Wenn aim der Arbetskolleeg e vorigs Diet Coke schänggt und denn sait: "Ahjo, das basst der nit, gäll? Do hesch no bitz Zugger zum Mische, no isches denn villicht e Full Fat Coke" - machets nit! Dasch fascht wie mit Mentos und das Züüg kläbt uffem Disch, y sags euch...

Anekdötli

Jäwoll, vo dänen Anekdötli gubtis e Huffe z verzellen, aber erschtens han y die maischte scho wider vergässe (was so ainiges über iiren Unterhaltigswärt ussait) und zwaitens ka jo niemer so vyl lääse. Drum do halt aifach e nit repräsentatyyvi Usswaal:

- Im Momänt wärde grad en Art Personalverdrätter gwäält. Für 2 Blätz hänn sich derby 3 KandidatInnee (hallo Marina!) zur Verfiegig gstellt (halt die wo Zytt hänn für so Züüg...). Noodäm der ainzig Maa in de Ferie gsii isch und d Kampagne vo de Konkurräntinne scho gloffe sinn ("Wenn wytter d Spese willsch zaalt ha no wäälsch xy" bzw. "Xy setzt sich für sticky buns an de Town Hall Meetings yy". Right.) hänn ych und der ander Brand Manager denn d Kampagne vom Mike an ys grisse. Är het unseri Plakat mitem Motto "Vote Mike, our IT Nerd" wo im Wäsentligen uffgfiert hänn was er denn alles so regalmässig versifft denn nit gsee aber sich aifach emoll bedanggt. Scho fasch überschwänglig isch denn d Freud gsii woner dä Mäntig wider isch koo go schaffen und syni IT Gescht ussem Hauptquartier z Basel iin uff die komische Plakat aagsproche hänn.

- Wie das scho das ooben au bsunders erwaggsen isch d Idee, die leere Bilderraamen uff der Dualette kreatyyv z fülle. Sytt my der ander Brand Manager uff die Idee brocht hänn hänggt dört jetzt e Baslerstab (isch jo schliesslig au e Puosslör Firma. Der Stab isch laider mittlerwyylen uffem Kopf, well der ander Brand Manager jo au sy Spass will haa - was denn no toppt wird wenner sy Gemaalin no fürs wyyblige stillen Örtli yyspannt!) und ebben au Blatt wo für der Mike wirbt.

- Gärn wär y jo au mitem Arbetskolleeg in Club go Basketball spiile. Won är mer denn verzellt ass dä 2. Ligischt kai 2. Mannschaft het isch my Enthusiasmus massyv gschwunde. Alli mitere schlächtere Mannschaft in der Region wurde drum am Sunntig trainiere - und das ka jo au nit d Lösig syy, zmindescht nit regelmässig!!!

- Wyybligi regionali Verkaufslaitere: "Pascal, y ha do sone Kund wo nit so rächt waiss wiener sich strategisch im sich wandelnden Umfäld sott positioniere. Hättsch Luscht my dört emoll bineren Art Strategie-Worskhop z unterstütze? Waisch sone Meeting han y aigentlig jedes Joor mit dänen, aber s wär not glatt wenn du mol bitz früsche Wind dört könntsch yynebringe."
Pascal: "Okay, aber gärn doch, dönt no intressant. Für öbbis han y dä Saich jo studiert!"
Iins: "Cool. Ah no öbbis: Verdraisch du vyl Bier und kasch ainewääg no klar dängge?"
Pascal: "Hm, y bi bitz uss der Iebig, aber das git mer wenigschtens en Ussreed um bis denn no bitz z trainiere! Das haisst mer wurde denn aifach am Oobe vorhär d Lambbe fülle, so s "Vertrauen uffbaue" und denn am Daag druff hänn mer e Sitzig?"
Iins: "Nit wirgligg. Mer zien ab em morgen aifach vo Pub zu Pub und dien bitz plaudere".
Pascal: "Aha - das haisst y loss der Laptop wool dehai und Flipcharts wirds dängg au kaini ha. Perfäggt!"

- Zum Schluss no 2 exdärnig üsserscht wärtvolli Byydrääg (uff die Linggs muess me jewyyls kligge):

My Läbensphilosophie uff der Punggt brocht

E Bärner brichtet vome Fulham Match - in de Kommentär findet men au no my Richtigstellig...

Nodding Nora

So, ass wider emoll öbbis gschriibe wird, gseener unten e Föteli vo mim Yygangsberaich. Der Wärbeteggscht han y mol der Zensur gopferet. Offiziell haisst das Ding "Nodding Nora", wells mitem Kopf ka gwaggle. Insider wüssen allerdings z brichten ass s Nora nit sone schöni Kue gsii isch und uff däre Pappe jetzt drum aigentlig s Naomi druff isch. Mer haisse s Naomi bi mir dehai härzlig willkomme!
Der Saich isch nummen ass ych so Züüg halt amme no fröölig verzell, z.B. wäärend em Fisch Ässe mitem Nutzdierli-Mänätschment-Team. Die obligate Sprüch im Stil: "Aha, dörf sy denn ammen au nääbe dy hogge zum Färnse luege?"; "Die niggt wenigschtens amme wenneren öbbis verzellsch, gäll..." hänn natürlig nit uff sich warte loo.

So, die Wuche goots jetzt zerscht emoll uff e Hiener-Farm inkl. langer Autifaart um my Bsuecher vom Fluughaafen abzhoole (Zyschdyg; Saufarm goot jo im Momänt schlächt wäge däm elände Food & Mouth), kurz vor mym Trip ind Heimat Ändi Moonet will y non e Workshop machen irgendwo in der Mitti vom Land ass alli Dailnämmer glyych wytt mien aaraise. Spötischtens im Novämber isch denn e Trip uff Wales plant. In däm Sinn: Mae tocynnau y Ffair Aeaf ar gael nawr (oder so - nimm dä Härdöpfel uss der Schnuure!).

E neui TV-Serie wo no intressant isch (die wo Venture Capital wänn dört verhandle maischtens unglaublig schlächt...) han y au entdeggt: Dragon's Den. Sicher besser als all die "Traumjobs" und "Start-Up" uff däre (Schwyzer TV-) Wält!

No comment...

Update: Fulham & Sky

S git aigentlig nit vyl neus z bricht, y ka do numme no rasch bestätigen ass y my glaub sowytt seer guet am Yylääbe bi. S Autifaare goot aigentlig relativ guet, dangg mynere Sky Box lauft s ganz Wuchenänd irgend en änglische Match und wenn nit gits jo no d PS3. Im Gschäft hänn mers aigentlig immer no seer glatt ("Ou, mer mien jo no der 5 Jooresplan mache - wär dänggt sich d Zaalen uss?") und sytt y mol Big Brother UK aadöönt ha isch das au e guete Running Gag ("Hüt könneter my nit uuseschiesse, ych bi jo schliesslig der Mind-Guru"; "Het öbber der Danny gsee?" - "Jo är isch mitem xy im Diary Room (= en Art Sitzigszimmer wo me sogar im Open Office sy Rue het)"). Au guet isch gsii: "Hesch denn gueti Noochberen im Stadion?" - "Du kai Aanig, in der erschte Halbzytt isch e nice young lady linggs vo mer ghoggt und noch der Pause blötzlig en alte Sagg." - "Ha-ha!"

Am Mittwuch het no der Head Pharma UK für ys sy Business präsentiert und wie sich das für e Blogger (är schryybt jede Moonet öbbis uffem Intranet) ghört het er das guet und interaggdyv (an Art Quiz) gmacht. (Das döönt jetzt irgendwie so spannend wien e Seniorebummel-Bricht vo der Alte Garde vo de Stainlemer, aber s isch halt wirgligg eso gsii!)

Punggto Fulham sinn bis jetzt zwai Mätch dehai gsii. Der aint letscht Mittwuch hänn sy bi unglaubligem Schaisswätter 2:1 gwunne (obwool der Goalie aimoll böös dernääbe glängt het) und dä am letschte Samschtig 1:2 verloore (vor allem au well sich unsere Captain bim (!) Schiesse vom 1:0 verletzt het, der Goalie bim Ussglyych wider dernäbe glängt het und der Schiri au regulärs Goal von ys nit gää het). Unglüggliger goots kuum met - aber no krass das mitem Captain, dä isch doch au scho 35 und het villicht sy letschti Ballberierig in synere Karriere grad zumene Goal verwärtet...

D Stimmig isch nit so der Hammer, es het e Hampfle scho fascht "Ultra-mässigi" wo der Match duure stöön, ständig singen und bitz Drümmele. Die andere mache halt so bitz "uffen-aabe", d.h. me muess immer uff der Huet syy ass me nit blötzlig die spannende Szene verbasst well men aifach hogge bliiben isch. Was vor allem überrascht isch ass d Gäschefans bis jetzt no relativ wenig uss däre Situation gmacht hänn und maischtens au uffs Muul hogge.

Amme Matchdaag kumm y mitem Zug aa und ha denn e Marsch vo 20-30 Minute vor mer, unter anderem duur e schöne Pargg. Ins Stadion kunnt me denn dangg seer vyle Draijkrüz ooni Aastoo (hallo FCB!) und untersueche loo muess me sich aigentlig au kuum ("Isch das e Schirm?" - "Ehm, jo." - "Okay, cool. Have a good game, cheers mate".). Denn gib y e Vermööge für e Bier uss, lueg wäärend däm bitz Vorbricht oder en andere Match uff de Bildschirm und gang denn kurz vor em Match (aber no vor der Durchsaag "Kick Off isch in 5 Minute, göönd bitte an eure Blatz" wenn alli andere sich mol dört aane bequeme) zu mim Blätzli. Notabene bin y denn nit so degeneriert wie die andere wo ärnschthaft sone e Ding vo aim vo de seer vyle Type kaufe wo miteme Ruggsagg mit PET-Bier ummelaufe. Nai do stand y lieber bitz am ainzige Stand mit Offenusschangg aa. JETZT HÄNN NIT EMOLL ME D BRITE BIERKÜLTÜR???!!!

Der luschtig Momänt isch denn wenn der Mohammed Al Fayed yylauft und der Speaker sait "Put your hands together for our chairman!" - no gits e Standing Ovation, der Al Fayed lauft mit 5 Bodyguards yy und isch ganz happy. Hejo, är butteret jo au der ganz Stutz in dä Club ass iin wenigschtens e baar Brite gärn hänn (me liebt en do nit so well me nit waiss vo wo är sy Gäld ursprünglig gha het und wäge der ganze Diana-Gschicht).

Noch em Match isch denn amme scho zymlig Stau, obwool vyl Lüt friener göön um das z verhindere. Aber s Stadion liggt halt au zimlig cool, grad immene Woonviertel und an der Themse.

D Brite sinn jo sunsch nit uuuunbedingt e Service-Gsellschaft, aber geschter bin y noch em Match an e nätte Herr groote. Y ha mitem Lee, e Kolleeg vom Ussdusch in Duke abgmacht y kääm in sy Gegend go Znacht ässe. Derfür han y miessen U-Baan faare und well d Station nach em Match so überfüllt gsii isch hänn sy aim grad uffs Glais gschiggt und nit an Automat gloo. Won y denn in London Bridge aakoo bi han y natürlig au kai Billet gha zum Uusegoo und drum d Lüt dört aaghaue: "Ehm du, die hänn my kai Billet kaufe loo in Putney Bridge" - "Worum denn nit, sir?" - "Jo wäge Security, s het..." - "Ah kai Stress, gang aifach do duure" (und het s Dörli uffgmacht). Messing!

Jo mitem Lee (wie sich das für en Ängländer im Rääge ghört in Shorts und Flip Flops) isch denn guet gsii, mer hänn türkisch gässe (Mami: Das mit de Kalamari als Vorspyys undem Schoggi-Kueche isch e böses Grücht) und sinn nochhär no gon e Bier dringgen und hänn ys bitz über die gueten alten, die gueten aggduellen und die gute zuekünftige Zytten unterhalte (House Warming at his place potentially coming up - numme het er aigentlig gar kai Blatz...). Sy Brueder het jetzt au grad fertig studiert und isch im Raame vome Graduate Program Filiallaiter bimenen Aldi in der Gegend! Find y no guet!

Dämfall: Cheers - e doots Känguruh han y jedefalls nonig gsee!

Da Brits

So, also mittlerwyylen isch men in Ängland aakoo. Me woont in Elvetham Heath und het mitem Gschäftsauti (e GSCHALTETE VW Diesel - halleluja!) ca. e Viertelstund zur Arbet im Frimley Business Park (open space in extremis...).

Sowytt isch das alles au glatt - s Team isch immer no cool ("Hey, ych ha mer dänggt du könntsch sicher e Velo bruuche?" - "Bring it on Carl!!!") und het a Mordsfreut wenn der Tülli am morge schwaissüberströmt (schalte strängt aa - zmindescht mental!) im Büro uffaucht. Sy wüsse au ass sy lieber nit glyychzyttig mit mir uff der Strooss sinn. D Kantine isch no relativ guet und s het gratis Getränggemaschine wos nit numme gruusige Kaffi sondern au so gsundi Sache wie "Raspberry Flavoured Water" het.

S Budget für myni Product Range isch für nöggscht Joor relativ konservativ - derfür bin y bim Ussgoobebudget entsprächend entgege koo. Aber das wird jo eh nit so der Focus syy, sy wänn my jo mee so bitz für divärsischte Analysen yysetze wo men au emoll e Bitz muess rächne...
Sunsch sinn mer "flyssig" (für UK Verhältnis halt...) draa d Brand Plans fürs nöggschte Joor in die Templates z fülle. Mer hoffen aber aigentlig ass ys das nit z lang wird dervo abhalten ins Fäld uusezgoo und bitz nööcher "daaa wos lauft" z syy. Nase in die Gülle! (Ha kürzlig unserem CFO gsait y haigs immer toll gfunde nit in vyl Meetings miesse z goo, dasch jetzt halt bitz anders - und d Trainings kömmen alli au no).

Vyl mee gits aigentlig nit z verzelle - s Züügle isch relativ guet gange, mol abgsee dervo ass d Vormieter aifach iiri Mikrowälle guet versteggt hänn und y jetzt parallel könnt "koche", die wieschte Lambben alli no do sinn und men aigentlig kaini aigene Bilder sott and Wand nagle. Aber das lueg y denn no genau au wenn y der Verdraag bikumm - v.a. spricht jo nüt dergege die wieschte Stelle vo de Vormieter z überdegge, das sölle sy denn halt aifach erscht noch mir neue mache. Ahjo, wenn y do grad in däre Community noch em Schaffe mitem Auti gang go yykaufe kumm y mer irgendwie eher amerikanisch (Wal Mart Style) vor als britisch.

Ahjo, grad han y bi Ikea no sonen ussklappbaars Gäschtenäscht bstolle. (Aifach asses em Böschtler näbe der Liiferig vo Sky Sports TV, Cable & Phone sowie der Playstation 3 nit langwyylig wird - (jäwoll mir isch scho klar ass das Ikea sälber bringt)). In däm sinn: Söllenemoll koo und C'mon Fulham!

So, und jetzt wird das au no mit Fötteli untermoolt:

1 Mayfair Court, Turners Avenue, Elvetham Heath GU51 1DZ - do im Parterre rächts

Und so gseets denn ebben innen uss: Kuchi (jo s Newcastle isch grad Aktion gsii - thx!)

Ramschsammlig im Woonzimmer

Food Séléction Spéciale

S Autöleli

Biz Trips

Nice rooms,

room service,

and tons of castles!

New York Cityyyyyyy!!!

Wie die maischte hoffentlig wüsse het men e Wuchen inklusyyv em Jooreswäggsel mitem DanseMän in Frickin New York City verbrocht. Y bi jetzt z fuul do die ganze Gschichte vo wäge "There you go big man", em bulgarische DJ Bobo Fan wo mer bi der Statue of Liberty Fish & Chips verkauft het etc. z verzapfe, fass my drum kurz und loss d Föteli für sich spräche. Ahjä: s isch der Hammer gsii, und wenn me denn grad no emene historische Basketballspiil vo de Knicks ka byywoonen und (exzessyyv) vom Ussverkauf profitiere wird die Stadt grad no gailer als sy eh scho isch. Wie haisst's doch so schön uff aim vo de wenige Shörts wo nit in aim vo myne Köffer glandet isch: I luv New York!

Zerscht emoll (ass mer ys nach dem laamen Yystiig wo jetzt grad folgt no geeeeewaltig könne staigere) en Album für all die wo gärn Föteli aaluege (me muess uff das Föteli unte Kligge, waisch Monn) wo me scho dausigfach gsee het (gäll Dan!) - aber okay, wenn YCH se so gekonnt due verwagglen ischs natürlig öbbis anders...

New York Cityyyyyy!!!!

Und jetzt no baar halbwäggs glatti Sache:

Am Silveschter hänn mer ys uff die 8i in Richtig Times Square begää. Well irgendwelchi Freaks dört scho sytt 8 Stunde gstande sinn hets ys denn bis 2 Blocks dervo entfärnt glängt, no isch abgsperrt gsii, so ass der Dan syni Morgestraich-Erfaarig nummen in relativ beschränggtem Raame (derfür nit minder "passionate" het können usslääbe). Ainewääg isch dä Ball so winzig ass men au vom Square sälber nit wirgligg vyl gsee hät. Mer hänn denn d Bekanntschaft mit Israelis gmacht wo mit ys hänn welle schmuuse obwool sy dört gar nonig gwüsst hänn ass mir uss däm Basel kömme wo für sii schon e gewüssi Bedüttig het. Usserdäm hets au sunsch no baar komischi Lüt gha, wo mer do nit nööcher möchte blooss stelle. Wie men uff de Föteli gseet het denn au no d Füürweer bitz der Max gmacht und sich der patriotisch Applaus gmacht, s het e myggryggs Fürwärgg gää und nochhär sinn mer hai gangen und hänn mangels Löffel der kauft Glacé halt mitem Schuelöffel gsputtet. Ha!
E wiescht belüüchdete Durm, e Staute of Liberty wo woorschyynlig nit in der Hand sondern im Muul duet schmelzen und e Shopping Maniac vor eme Baum:

SO DO HESCH DIE FÖTELI - ZFRIIDE???!!! ;-)

Dasch sinn jetzt bitz Insider - aber jedefalls sott ych mii dört aigentlig puudelwool füüle!!!
Chinesisch go ässe sinn mer au emoll - derbyy hänn mer ys in e riisigi Halle gwoggt wo me sich vorkoo isch wie anere Versammlig vo der kommunistische Partei. Mir hänn ys nit mit em Dim Sum begniegt, wo men aifach uff öbbis zaigt wo uff Wääge verbyy faart - numme hänn mer nit ganz tscheggt ass die Portione Nuudlen offesichtlig nit wirgligg numme für jewyyls ai Persoon bestimmt gsii wääre...Am zwaiten Oobe sinn mer go Knicks Basketball luege, und die hänn in der 3 (!) Verlengerig gwunne wo vyl scho gange sinn wells so lang gangen isch und meerfach zimlig hoffnigsloos ussgsee het. So sinn mer Züüge vomene historische Spiil worde. (ps: dä Finger het faaaaascht nüt koschtet, aber macht sich no guet uff em Sideboard...) (pps: S Newcastle Brown Ale in der andere Hand isch au praggdysch gratis gsii...)


Charmin het am Times Square aifach e grosses WC aanezauberet. Ch-ch-ch-ch - Charmin!

Mjamjam - wider emoll xund unterwäx!
Nai Marc, statt em Lace sinn mer numme ganz brav und aaständig ins Hooters gange. Und dä adrett jung Maa het ys beglaitet und nochhär in die kultig Bar vom Hudson Hotel gschlebbt wo 3 Dääg spööter s Frollain Aguilera mitem Frollain Simpson schyynts Silveschter gfyyrt het.

Der Inveschtment Bängger bim Bull und vor em Lehman Gebäude won er schomoll relativ intensyyv vo inne gsee het

In däm Sinn: Tschau Niu York, schön ischs gsii!


ps: s neue SIMpact isch übrigens au online - feat. au relativ prominänt mii so gege s Änd vo der Ussgoob...

Some Duke Youtube Videos

Mascot Surfing

Cameron Indoor Stadium Tour

Legendary Buzz Beater vs. Kentucky

Another Buzz Beater

B-School (Fuqua) Movie

JJ Redick Highlights

Neui Wuche - neui halbwägs glatti Sache

- Der Duke-Taha het mer ins Gschäft aaglütten und ych han en bitz beroote well är sich nöggschte Zyschdyg (good luck!) bi Monitor goot go vorstelle. Guet, aigentlig wänn die glaub aifach emoll gsee wär se die ganz Zytt mit Mails duet stalke well sy iin nie zumen Interview hänn wellen yylaade, filme das denn und zaige s Video uff der Wienachtsfyyr. Das han em denn au verzellt und är füült sich jetzt glaub vyyyyyl besser und weniger nervös... Item, noodäm y däne scho meerfach übermittlet ha wenn d Fasnacht im 07 isch ass sy gfelligscht verbyy kömme het dä ärnschthaft d Aier my z frooge: "Wenn is your beer festival again?". No nie doo gsii aber intuityyv erkennt um was es aigentlig goot - villicht han y das amigs au bitz unpräzyys verzellt...

- D Spanier hänn sotten e Business Case zämmestelle und ych ha das fründligerwyys zmindescht konzeptuell für sen erledigt (Power Point lässt grüssen) bevor sy richtig aagfange hänn. Wo denn d Brand Manätschere zue mer koo isch umd Details z bespräche het sy gfunde: "We are really worried - you must have done this over the weekend. Jacinto (der Scheff dört z Barcelona) said you really need to find a girlfriend" Y ha denn gfunde: "He might be right about the second part, but I haven't worked on weekends for ages" S isch denn per Mail no bitz wytter gangen und y ha gfunde y miess halt mol uff Barcelona goo und der J. könn jo denn baar Alternatyyven yyfäädle. (Worum sy das denn so verstande het ass y vo IIM als Alternatyyve reed muess aim denn so RICHTIG z dängge gää...)