What a Birthday!

Gescht het der Tülli jo Geburtsdaag gha. Zem Znacht isch me denn mit der Family ine Quartierbaiz wo der Babbe der Baizer kennt - s Ässen isch guet und dä Maa aigentlig none Glatte (Italianità!) au wenner amigs bitz verwirrt isch. Näbem Rotwyy het der Tülli denn der Fääler gmacht asser none Caramelköpfli gnoo het - natürlig gits dört no massiv Amaretto druff. Guet, villicht hätt y halt doch vorem Salätli none Suppe sotte nää no hätt y eventuell druff verzichtet das schnapsige Sössli vom Köpfli usszlöffle.... Zem Abschluss hets denn no 4 Espressi gää und woner ys no het welle Grappa bringe hämmer aigentlig zimlig vehemänt abgläängt. Item, wenig spöter isch dä Alk scho in Gleesli gfüllt gsii - d Fläsche wurder doo loo mer sollen aifach nach Beliebe noocheschängge...

Guet, me het aso scho bitz vorgschafft gha. Well sich e glaine Dail vo der Glygge no in der Stammbaiz droffe het isch men au no kurz zu dären illustren und glatte Rundi ghoggt und het no rasch 3 Bächer yynegleert. Normalerwyys han y jo aigentlig scho mit 0-Pegel Mie mit Gummibärlisaft, aber ebbe, Unvernunft isch halt au öppis Glatts.

Jedefalls isch me denn mitem Standardbeglaiter ins Fame gange. Im Verlauf vom Daag het me jo divärsi glatti und komischi SMS-Glüggwünsch bikoo. Unter anderem au ain vo däre Damen usem Oschte wo mer vor nit allzu langer Zytt an iirem Freudedaag in der verbottene Stadt bsuecht hänn - ääns het denn gfunden y sig jo kuum z Sanggalle und das denn so implizit beduurt woruff der Verfasser vo däne Zyyle gfunde het me könn das jo noochehoole. Jedefalls het denn der Beglaiter (me merggt: well so vyl mitläse wärde kaini Nämme me gnennt...) uffgrund vonere Aamerggig vonere relativ glaine Person schone Voraanig gha ass die Üsserig so wool scho nit ganz stimmt. Y ha gfunde das syge doch Hirngspinst, aber daatsächlig - e rundum glungeni Überraschig!

Schliesslig isches wie befürchtet bzw. erwartet im Fame so äng und haiss gsii ass men aigentlig kuum danzt het sondern aifach mit Gummibärlisaft in der Hand ummegstanden und bitz gschäkeret het. Mir het das aigentlig no gfalle. Highlights sinn d Unterhaltige mitem "el cornutto" ("Haltsch mech füren Aargauer?!", d Beglaitig vo der glaine Person), und dä Kolleg wo sich an mer mitem Satz "Los my rasch duure, muess zem Geburtsdaagskind, waisch my Cou-Cousine het Geburtsdaag" duuredränglet het und jetzt e saumässig schlächts Gwüsse het ass jo au no öpper anderscht "draa gsii wär", gsii. What e sentence, isch jo grauehaft - nämmet däm dä Blog ewägg!

S het aso ainige Lüt dört nit so gfalle - ych has aber aigentlig no gnosse mit so vyl bekannte Lüt dört z syy. Numme der fortschryttend Pegel het my denn derzue bewooge kurz an die früsch Luft z goo - natürlig ooni wytteri Folge, mer sinn jo nit z Rimini... Grundsätzlig han y my aber durch der ganz Oobe gsiecht well y nit so zwäg gsii bi, folgerichtig han y denn au nit wirgligg lang gmacht (woby das jo scho seer relativ isch...). Röggli binis!

So, das sinn die konfuse Gedangge gsii vo aim wo wurd liege wenner wurd saagen asser der geschtrig Oobe nümm spüüri...