My name is Zimmermaa....

My Mainig vom Fach Mediewüsseschafte isch jo quasi gegedailig (gschiggt uff Fremdwörter verzichtet...) zur Mainig vo usgwäälte Studäntinne vo däm Fach. Drum isch die Mainig au nit uff wochelangem Notiere vo Daagesschausändige oder kompläxe GatekeeperOpinionMakerKommunikationsmodäll basierend, sondern aifach an Aasicht: D Wältwuchen isch gail! Guet, der Kriegskurs vom Born verstand y immer nonig, derfür hett mer gfalle wie dä Gämpfer Islamischt ind Egge driibe worden isch, erscht Rächt sytt die belaidigte Läserbrief vo synen Aahänger dinn gsii sinn. E bsundere Gruess goot au no an d Fraue Kuenz us Basel (wo am Sunntig sicher au der Gebätsdeppig vor Freud ind Luft gschosse hett und d Foto vom Jean Ziegler küsst hett wäg de Waalresultat) - ass men im Facts und der WeWo dä Brief druggt hett wo syy s Abläbe vo däm palästinänsische Terrorischt beklagt hett well das sone barmhärzige und grossartige Staatsmaa und Freihaitskämpfer sy isch scho erstuunlig.

Zrugg zer WeWo: Der nej Scheff der Heusser bringt's aigentlig maischtens uff der Punggt, no besser und weniger penetrant provokati als der Köppel. Guet, d Kolunischte sinn bitz Gschmaggsach, Mörgeli und Gaillard aifach strunzdumm und der Seibt vo der WeWo zwüsche brillant und erbärmlich. Au der Bodemaa hett in letschter Zytt vemeert Ussetzer - in Zuekunft aifach regelmässiger gege d Buure, no isch guet. S Highlight isch aber ass der Meyer aka Federhure jetzt schyynbar öfters derbyy isch - syny Usfierige zem Gschlächterkampf han y schomol online gsee und das isch - näb de neue Kolumne über Gender und Krieg gege s Änd vom Heft - en absoluts Plus für das Heft.

So, isch mol Zytt gsii ass dä Blog bitz wägg vom raine Daagebuech kunnt - isch jo schliesslig nümm Kindergarte...

Morn kunnts jetzt zum grosse Staine-Duell im Hattrick. Schad kumm y erscht am Donnschtig derzue z luege wär für my Stängeli goolschützetechnisch verantwortlig gsii isch. Platini goot unter, nämmlig!

What e Weekend!

Zerscht dä grauehaft Uffdritt vo de Rotblaue gege die absolut blinde Schotte, denn der Fascht-Absturz vom Anschbi im Käller vo der Alte Garde won y quasi e Kurzussbildig als Altepfläger ha könne gniesse. Am Sunntig hett denn wenigschtens der FCB gwunne - d Ergäbnis vo de Regierigsrootswaale hänn allerdings derzue basst. D Frau Herzog schwätzt öppis vo wäge "me muess jetzt den Armen und Grangge Sorg draage und nüt me sparen in däm Beraich" - die waiss halt wär sy wäält und ass me mit der Verschuldig die böse Bürgerliche ka verdryybe wo die andere wääle. Y glaub aber au sy het doderbyy au an Muri dänggt, derbyy isch das jo au ain vo dääne wo gar nit in der Stadt woont. Der Guy Morin widerum isch aigentlig numme der Oli Kreuzer Fussballgott mitere wieschte Larven aa - das höört me ganz genau wenn är s Muul uffmacht. Y dängg är wird sich in erschter Linie derfür yysetzen ass LogopädInne vom Staat unterstützt wärde. Die Bürgerliche anderersyts hänn wider mol zaigt ass sy uff der ganze Linien unfääig sinn - härzlige Dangg au an Waichsoon-HaMaTschu.

Forschigsabdeit

Liebe Drüggi,

Hüt bisch du vor mir im Zug gsii. Jäwoll du - e gränzsenil-halbverfalleni aber grundsympathischi Dame mit Wanderusrüschtig. Frie hesch dy uff der Wäg in Richtig Düüre gmacht denn in dym Zuestand kunnts uff jedi Minute druff aa. Schad nummen ass de denn sinnlos Energie verpufft hesch indäm de scho 20 Sekunde vor der Aakunft uff der Knopf druggt hesch wo d Düüren in e Zuestand versetzt, wo sy scho gha hett - nämmlig zue. Ass de das Ritual denn no meerfach widerholt hesch wo der Zug scho lang zem Stoo koo isch wär wirgligg nit nötig gsii. Y ha dy denn uss der Rotlosigkait erlöst indäm y zem seeeeeer wytt härgholt Schluss koo bi ass men uff das Knöpfli muess drugge wo grien, y widerhol: grien glüüchtet hett. Derfür hesch mer denn e verwirrt-liebevolls Lächle gschänggt. Merci. Y dängg de wirsch s nöggscht Mol nüt drus glernt ha, y ha dy nämmlig durchschaut: du bisch immer die glyych wo my verfolgt und in d Verzwyyflig will dryybe!

Überlengi

Wie ka me so doof syy und für e Presentation, wo me 15 Minute Zytt het 30 Slides vorberaite? Dasch erschtens unfair für die wo sich and Vorgobe halte (wie mir) und zwaitens han y drum in däne 4 Stund ganzi 20 Minute Pause gha (und überzoge hett me au no 10 Minute...). Isch halt au glatt wenn der CEO vo PWC (oder PiiWiiSii wie der Pseudo-Slang-Ami maint - ha gmaint PVC si öppis anders...) nit merggt ass sy Zytt scho verbii isch (notabene 2 Stunde) und är nit emoll no in der Helfti isch d.h. s aigentlige Thema gar nonig adressiert het...

Wenigschtens d Oscht-Fraktion hett my drotz Überlengi begaischteret. Wie der aint em andere het welle mitdailen är söll presentiere und sy sich denn gegesyttig d Slide vor und zrugg klickt hänn well der ander halt gfunde hett me könn sich do scho bitz Zytt loo isch fascht so glatt gsii wie Praxisexample über s Frauenuffrysse (fascht wie beautiful mind, aber dä han y jo gar nit gsee).

Wie wüssen aigentlig die Ukrainer (und d Wältmedie) so sicher, ass jetzt dä Oppositionell gwunne hett? Könnt jo syy wie im Ami-Land, ass der Oschte (in däm Fall) halt no bitz Sowjettreuer isch. Klar, y glaub au ass dört bschisse worden isch, aber sich uff Nochwaalbefroogige z stützen isch jon e Witz. Do bruuch y kai Möggli und Schwyygespiralen um z wüssen ass me sich halt villicht nit derzue bekennt, ass me no die Russetreue gwäält hett.

Anekdötli

Prof schwaflet uhuerelangwyylige Saich und reagiert denn uff "Signal" uss der Klass: "Am I losing you, Markus?" Studi: "Not completely..." 15 mind later again: "Am I losing you, Lasse?" "Well, physically I'm still here...".

Gail isch au wenn ain in der Philosophie krass ain uff fundierten Ami-Kritiker macht und denn vom McCarthy aafoot schwafle: "Wisst ihr, das war so ein Amerikanischer Präsident, der..."

Yyskalt

Well me die böse Spitze zem Yyshockey (oder so öppis äänligs...) im nöggschte Stainlemer ka lääse möcht y doo nit gross druff yygoo - s isch jedefalls e glatten Event gsii.

S woore Highlight vo däm Weekend isch aber aigentlig scho d Begegnig zwüschenem Penner Roman uss Uznach und em Hailige St. Martin (vulgo Peterli) am Samschtig Morgen uff der Mittlere Brugg gsii. Ass y by däre legendäre Diskussion ("Du tönsch wie wennd au vo Sanggalle chunnsch!"; "My Mitbewohner hett mer de Schlüssel kchlaut!"; "Y gang numme duur d Riigass damit y bitz warm ha vom laufe!" jojo...) ha deerfe Züüge syy find y glatt.

Jetzt han y wenigschtens e Grund hütt bitz Nordwescht 5 z luege - isch no praktisch wenn me "sy Färnsee" ka mitnää. Isch jo nit s erschte Mol ass en Unternämme numme wäge der Profilneurose vo Mitarbeiter so Züügs kauft - y dängg das goot unter "Empire Building". ;-)

In däm Sinn: Wenigschtens die gmischte Sujetkopierer butzt...

Das isch der Fred. Nai, kai Thread, sondern der Fred. Är isch en Ami, aber sunsch aigentlig ganz in Ornig. Uff Basel kunnt är nit numme für d Fasnacht, sonder sogar für die entsprächend Sitzig. Denn nimmt är sogar Zigarre und Crab-Cakes mit. Statt bitz z pläuderle ruumt äär denn amigs der ganz Oobe Gleeser und Fläschen ab. Well är sone Fasnachtsnarr im woorschte Sinn vom Wort isch find ych iin e gaile Siech. Döönt komisch, isch aber eso. 

"Schowi"-Session

1. Fraue hänn kai Aanig. Y has vorhär in der Grubbe mitere signifikante Stichgruppe (n=4) zdue gha und ha mer aifach e Schranz glache wo me hätt sotten e Synergiepotential berächne. Sy sinn denn schlussändlig (y ha my emenen andere Dail vo der Frogestellig gwidmet) glaub uff 200 Mio ko und hänn dopplet so lang gha wie anderi. Item, d Lösig wär eher by 20 Mio gsii - schad hänn sy sich knapp entschiide nit freywillig z presentiere. Immerhin het Bain denn s Zmidaag gsponseret.

2. Was hänn Fuessballmätch im Zürcher Färnsee und d Bätschelerett gmainsam? E Huffe Männer rennen aim bzw. zewai Bäll nooch und d Protagonischte (Kommentatore bzw. s Monika) sinn dumm wie Brot. Bym Schutte ka me wäge der der Stadionathmosphäre laider der Doon numme schwerlich abschalten, aber bim andere wird y mer das überleege.

Übrigens: wäärenden Schlittschuefaare mit Stängel in der Hand ka me kai Bier dringge - dr Samschtig hett drum Äänligkait mitem hüttigen Apéro-Lunch wo alli Orangesaft gsoffe hänn bis uff ain. Alles Röggli nämmlig!

Drückeberger

Ass der Rentener us em Zuug no mee z stuune hett mache mer grad wyter:

Pyynlig isches:

- wenn me krass (und schlächt) ain uff Ami-Släng macht aber e th nit vomen s ka unterschaide.

- ai Wuche noodäm men erklärt bikoo hett ass nit jede neue Börger im McDo e Produktinnovation isch sondern der Fokus maischtens uff der Kundebindig lyggt bym Thema Starbucks vo der Produktinnovation vo de Zyttigen im Kaffi schnuurt...

- me statt 15 Minuten aifach dobblet so lang presentiert well men alles 3mol widerholt (ächt? der Hayek hett au e Rolle gspiilt?)

Glatt hingegen isch me:

- Als Sproch-Version vom "Jögschemesch" us der Ukraine - do machts au nüt wenn me findet ass Swatch sott in Klaider und Hüüser (!) diversifiziere.

Au s TV-Programm hett ainiges z biete: Der Calli wo d Kampflesbe-Verschwörig durchschaut hett und drum halt der Theorie-Bubi dinn losst. Drfür isch 40 Dääg und Nächt e grauehaft langwyylig-durchschaubari Schmonzette.

Usserdäm im Schwyz Aggduell e Punkt-Demo uffem Güller Märblatz - schad han y das nit gwüsst sunsch hätt y no könne go Inseggdespray kaufe. Immerhin isch der Wortfierer vomene sone Verain ain wo zmindescht mol an der HSG gsii isch - remember "economic history". Villicht hett men iin jo scho verbannt noodäm jo immer d WTO und d Wältbangg an allem schuld gsii sinn.

Vyl-osophischs

Hüt im "Europa und Amerika, ein philosophischer Systemvergleich" isch mer einiges uffgfalle:

1. Wäärend y geschter im "Politigg und Medien" dailwyys dröimt ha und denn blötzlig öbbis vo mir uff mim Blatt notiert gsii isch wo n y my gar nit erinneret ha ass y das in der vorhärige Minuten uffgschriibe ha hett sich my Dätigkait hütt meerhaitlig uff rains Dagdröime beschränggt.

Drum waiss y 2. au irgendwie nit, was är jetzt do zwüschem Wäber und em Tocqueville vergliche het. Dasch aigentlig schad, das wär doch e saumässigs Smalltalk-Thema für e Cocktail-Party gsii.

3. Sinn anderi do scho vyl routinierter. Y muess glaub au mol baar Titel und Autoren erfinde wo sicher niemerd kennt wells die wool gar nit git oder s zmindescht niemerd glääse het - sone "schon xy schrieb ja in seinem Buch xy" macht sich halt scho no guet, au ooni Cocktails.

Usserdäm isch 4. das Föteli uff der Sytte nüt im Verglyych zu däm wo au no der Phil druff isch - e woors Maischterwärgg!

Händ ue!

Guet, in de letsche Dääg isch jo nit vyl erfreuligs bassiert - der FCB macht sich hochnäsig lächerlig und dangg der Schwoobebaan kumm y relativ spot im kalten Oschten aa. Aber nit numme s penetrante DH-Zaige wenn d Kameras druff grichtet sinn vome dapfere Junge Stainlemer isch e Liechtbligg, nai, au an der Uni bassiert revolutionärs: Der Tülli streggt uff!

Tatort: A201, "Politik und Medien", hütt, ca. 14.30 Uhr. E Vorläsig wo me sich frogt wie men e ganzes Publizistik-Studium ka rächtfertige, wo s doch nümmen um 1-2 Kommunikationsmodäll und iiri Variante goot, aber guet, dasch kai neui Erkenntnis. Nai, s erstuunligen isch, ass inere Vorläsig wo s wool meerhaitlig "International Affairs" Lüt het (aso die illegitime Nochfolger vom Peterli) kain waiss wie der fyys Kampagnemänätscher vom Doppelschorsch haisst. Däm Truurspiil hett der (notabene BWL-) Tülli denn nachere knappe Minuten en Änd gsetzt. S isch drotzdäm en unagnääms Gfüül, aso süchtig drnoch wird y glaub kuum.

Usserdäm isch my Wandlig zem Networker scho fascht unglaublig. Do wird mit fremde Lüt Zmittag gässen und mit der Sektion "Kaffiautomat" Smalltalk betriibe - y fang my scho sälber afo wiiderlig finde ;-) Hett men äggscht wäge däm bestummen, ass y jetzt in sonere Gschpürsch-my-Evaluation-Quality-Development-Group muess mitmache? Was macht me nit alles um sich bitz yyzschlyyme - der höggscht GMAT verpflichtet halt scho ungemain.

Der Räggder vo Laufen isch übrigens e gaile Siech, wäärende M'chestai nit emoll der Aakündigungsbrief glääse hett. Dört wird alles in Projäggdgrubbe delegiert - I'm impressed by Mr. Delegator, aber no mee by der Daatsach asses wool aifacher isch der UBS-Cello an d Strippe z bikoo als Räggder vo Käffer-Schuele. Immerhin han y in däne zewai Sekretärinne durch unseri stundelange Gspräch glaub zwai Kolleginne für s Lääbe gfunde.

S goot los!

So, ass der Tülli für sy belanglose Saich nümm s Propagandebletti vo der Staine muess missbruuche isch jetzt die Kolumnen uffgschaltet - me muess halt mit der Zytt goo sunsch goot me mit der Zytt...

Die hüttig philosophisch Frog luttet: Worum stöön by de Doppeldeggerzüüg vo der SBB immer die vornen an d Düüre wo kai Aanig hänn ass men uff das Knöpfli muess druggen um d Düüren uff z mache? Usserdäm isches erstuunlig wie vyl Ferie gwüssi Räggdore hänn - v.a. wenn der Tülli se miesst wägere Bresentation aagoo.

Doo non e wunderscheeeens Föteli wo die ganz Bracht vom Blogger erkennbar isch. Zum Glügg lauft dä nit ständig so umme...

Graduation Day