Privats

So, Uni isch au verbyy für das Joor. Nochere aasträngende Session (aso s körperligen isch für e Maschine wie mii jo kai Problem, aber seelisch bruuchts scho vyl Kraft wenn sich zwai stolz unterhalten ass der aint jetzt dörf im glorrychen Offiziers-Verain dailnää) goots gly Haim.

E kurze Ruggbligg: Am Mäntig s Feedback-Meeting mit em Omid und em Günti isch glatt gsii. Sy sinn sogar so flexibel gsii ass mer s grad uff Dütsch gmacht hän. Dasch pragmatisch und au unseri (hüstel - shouldn't take credit for this...) Vorschleeg sinn guet uffgnoo worde. Hätt ächt nit dänggt ass da öppis bringt, y dängg bym zwaite Meeting im Jänner gseets denn anderscht uss.

D Presentation im Organisational Behavior bym Chris (wow, mer sinn halt scho eggstrem unautoritär und ami-mässig...) isch au guet gange, är hett sich jedefalls begaischteret zaigt. Är bhauptet zwar das syg an unserem "dialogic approach" und em rollespiilartige Vortrag glääge, aber y dängg aigentlig isch my Gsangsyylag für d Euphorie verantwortlig, au wenn y glaub ass kuum ain tscheggt hett ass my Überlaitig "let's get critical, critical..." en Aaspiilig uff das grauehafte Work Out - Liedli vo der Olivia Newton-John (Grease lässt grüssen) gsii isch...

Geschter isch e lange Daag gsii drum han y d Philo-Session aifach "verschloofe"... Derfür hänn mer denn im Marketing unser Projäggt besproche und die andere Mitgliider hänn my zer Wyssgluet brocht indäm sy em Prof vorghüült hänn ass dä Teggscht so schwiirig und doof syg. Na Bravo - Röggli sinders. Im International Mgmt isch me derfür so gschiggt/fuul ass me noch der Helfti (sins insgsamt 4 Stund...) die erscht Pausen yyschaltet aber aim grad en Assignment git vo men au mit Pauseduureschaffe kuum schafft, v.a. wenn d Gruppe vo 4 uff 2 schrumpft well der aint abhaut und der ander wägem Rollstuel nit ka go Research betryybe. "Laider" könn er das nit benote obwool das doch so praxisnooch isch - do gib em Rächt, au in der Praxis sinn Boni maischtens nit fair verdailt...
Jedefalls han y genau 0 Minute Pause gha, well nochhär het me natürlig grad presentiert, und überzoge hänn mer au grad no 15 Minute - villicht au well my verbliibes Gruppemitgliid d Dynamik vonere bekiffte Gruppe Bärner gha hett...

Politischs

Das Gschyyss wäge däm Pro Helvetia Milliönli isch jo unglaublig - y möcht gar nit wüsse was das Ping Pong zwüsche de baide Kammere mittlerwyyle koschtet hett. Me sott villicht aifach emoll derzue stoo ass me das Kultur-Gschwüür nümm will und sich nit mit Details uffhalte - alles anderen isch zimlig uneerlig und e fuule Kompromiss

E lange Daag

Obwool der FCB und d Baanschranggen im Gool nit grad gross ufgspillt het (was aigentlig erstuunlig isch - au ooni vernünftige Zwaitinnevertaidiger muess me drotzdäm nit ab der Helfti uffhööre schutte) isch der geschtrig Daag aigentlig no glatt gsii.

Mit de Thuner und baar glatte Verdrätter vo der Basler Zunft (s Fäderli, e baar scharfi Schnitzelstraifen und der Hitchhicker) het me sich zerscht im Mutz d Lampe gfüllt, um die Däätigkait denn im PiWi und em Paddy's fortsetzte. Derby het d Zerstörig vo zewai Gleeser miesse beklaagt wärden ooni ass d Bollizey yygschrittten isch!

Am Match isch denn die halb Stainen im A ghoggt und hett de Junge iiri Wärt indoktriniert. Nit ally hänn s guet gfunden ass me dä lächerlig Urs Meier Fänglöbb mit de gsponserte Lyyli undem sauglatte "Das muss ich gleich Urs erzählen" Spruch mit leere Bächer yydeggt het. Uss mynere Sicht isch es numme verwärflig ass men aimool sogar 4dl Bier gopferet het... Schad aigentlig nummen ass d Sun uff e Mail vome Thuner nit reagiert hett wo gärn die Ängland-Fane gha hätt als glaini Erinnerig an EM-"Skandal".

S isch aber au no glatt ass es vyl Transpis im Stil "A.Z.C.A.B." und "F.T.P" ghat hett aber em Scheff sy "Schläger und Rassisten" Tail het nit yyne dörfe. Dasch halt au nit so "kompliziert" gsii wie die andere...

Aber ych ha das jo nummen us Erfaarigsbricht mitbikoo, bin y doch sälbstverständlig in der Kurve gstande und ha my öppe 234238Mol miesse rächtfertigen im Stil "Y ha der Stutz scho em Platini gää!" (notabene mitem Gruss an Rolf Sch.). In däm Sinn: dr Kampf goot wytter. Im Grichtssaal und (laider) wool au uff der Stroos. No kan y denn wider im Färnsee gsee ass d Hools gärn ins Spital göön um uff Köschte vo der Allgemainhait d Folge vo iirem grangge Tryybe z kuriere.

... und tschüss!

"Leider hast du dich entschlossen deine Email-Adresse aus unserer Email-Liste zu löschen. Bitte beachte, dass du ab jetzt keine Emails betreffend dem BaslerClub erhalten wirst. Darunter fallen seit neuem auch die Reminder zu den Anlässen. Du kannst dich zu einem späteren Zeitpunkt wieder anmelden unter www.baslerclub.ch.

Mit freundlichen Grüssen, Informationsminister des BaslerClub"

Juhui! Y ka s allerdings immer nonig ganz glauben äss y jetzt äntlig kai Mails me vome Club bikumm won y gar nit Mitgliid bi.

Hüt im WG het s übrigens e Grossuffmarsch gee. Uff em Wäg han y no en uns nit ganz unbekannte PwC-Wirtschaftsprifer gsee, aber bi halt knapp draa gsii drum kai Zytt für Smalltalk. Jedefalls isch genau AI! Nase dört gsii. Der Geeser isch aber saunätt gsii ("I bin e Feen vo der HSG!") und hett ys denn e Kaffi zaalt, no han y das Züügs halt aifach in Ainzelberootig verzapft.

Röggli-Bricht

Y möcht übrigens no erwäänen ass me sich au im Liggen e Krampf ka hoole. Der Magnesiummangel han y zwar noonig bekämpft, aber y bi halt immer no überzüggt ass d Diagnoose wo mer ain vo de Glyggen-Ärzt gstellt hett falsch isch. Das KA kai Aierstoggschwangerschaft syy, do bin y mer zimlig überzügt - Anschbi hii oder häär.

Zuedäm isches nach sonere graviiiiiiiierende Verletzig und ganze ZEWAI Nächt mit ainigermasse vyl Bier undere redaktionellen Nachtschicht au ABSOLUT LEGITIM wenn me denn uff usdeenti Danznächt in Nuggibüffer verzichtet und sich e kurzen Oobe vornimmt um denn wider bitz Bier z dringge.

Uff der Tilllate-Sytte hets übrigens by der Psychologe-Party no luschtigi Föteli vo unserem Rimini-Raisepartner feat. GB-Stuff. Dä hett my in syneren unnoochaamligen Art hütt übrigens kurzfrischtig zunere Rundi Nachtsquash wellen überrede. Y ha denn allerdings danggend abgläänt, das hett so gsund döönt und usserdäm han y jo divärsi Fore wäge de Kaschtewääge miesse vollmüllen und my froogen öb morn äggscht überhaupt öpper an die Bresentazion kunnt.

Käschtewääge

Do hett sich d Police Downtown jo wider e Digge glaischtet. In Zämmenarbet mit de Basler Kollege wo in Puossöll alles wo irgendwie nach Fan usgseet in der glyych Zug dryybe startet me denn e "spontani" Aktion wo Maitli und Familie mit Kabelbinder und Hüülkrämpf feschtghalte wärde. Mer halten also fescht:

- Bewegigsfreihait existiert nit. Wenn y wäärendemen FCB-Match wott uff Züri HB raise dörf y das nit. Diskriminierig und Pauschalisierig olé!
- Ass me vom Staat der ÖV will fördere isch aigentlig gar nit woor - dört kriegt me numme Probleem und nimmt drum s Auti. Anderersyyts isch me z Luzärn jo au scho wäge BS-Nummeren uusegwungge worde.
- Jetzt haisst's denn wider die Unschuldige sotte sich distanziere. Das dunggt my guet gwäärlaischtet indäm men alli uff der glyych Zug zwingt. Merke: Wär mit em Zuug goot kunnt in d Kischte.
- Aigentlig WILL me gar nit ass nüt me loos isch. Im Hoppers-Sektor brennt alles und s Spiil wird grad abbroche. Jedi koordinierti Aktion für d Zuekunft ka me grad vergässe well jetzt wool alli aifach in glaine Grüppli wärden aaraise und sich denn koordiniere - ass me denn us Wuet über die Willkür no öppis kaputt macht kann y sogar in gwüssem Maas verstoo.

Drum: Aahänger vo Verschwörigstheorie wurde wool vermueten ass d Zürcher Bullerey aifach d Fans will radikalisiere um dermit e Personaluffstoggig z rächtfertige. Vollidiote sinn sy well sy gar nit so wytt dängge. Zum Glügg bin y nit gsii und wenn wär glaub kuum der Zuug s Fortbewegigsmittel gsii. Wenn y numme draa dängg ass mit em Szene-Zug uff Wil vor ainiger Zytt alles paletti gsii isch - s kunnt halt näb em Gegner au no druff aa wie massiv d Bollizei aim provoziert. Die rain Presänz vo dääne Gselle han y no nie als Argumänt loo gält und spöötischtens sytt em Match im Letzi waiss y asses datsächlig seer gwaltgaili Siechen au unter den Ultras het - aber mit derartige Schikane macht men aifach alles schlimer. Dasch erschtens unmenschlich, zwaitens verfassigsrächtlig stargg bedängglig beträffend Diskriminierig und Freyhaitsberaubig (gits der Yytritt zrugg? Und was bewirggt son en Yytraag in der Hooligan-Daatebangg im wyttere Lääbe? 1984?) und muess drittens au für d Law and Order Fraktion schlitwägg als taggtische Fääler gälte.

S Düpfli uff em "i" isch allerdings ass denn Dail vo de Verhaftete nach stundelanger Bollizeyobhuet us der Kasernä kömme und dört vo Zürcher Hools abbasst wärde. Hauptsach baar Bengale verwütscht (uff wellere Grundlag die sotte verbotte syy waiss wool niemerd - s hett se jo no niemerds wellen ins Stadion nää...), wär intressiert scho die menschlig Gsundhait... S gailschten isch no ass me d Lüt wägen unerlaubter Rudelbildig will aaklaage - dodermit sait men aifach ass me sich sälber stroofbaar gmacht hett denn wäreliwär hett d Lüt zämmedriibe...? Jänu, der braite Bevölkerig wirds gfalle.

NeTülliWorker

Glatts Wortspiil....

Geschter zerscht der DocNet-Day. Isch zwar lang und ermiedend gsii, aber immerhin erhaiternd und interessant.

V.a. der UBS-Typ isch zimlig proletig gsi: "Der Bankenmarkt ist momentan wie eine Teenagerdisco: Es gibt viele Gerüchte, wer da wohl mit wem anbandeln könnte und schlussendlich passiert doch 'kaum was."

"Hier haben wir die Banken 'mal so eingeordnet: Global Banks, Investmentbanken etc. Sie sehen vielleicht unter "Andere" die CS - wir und die haben eben keinen Schimmer wo die überhaupt hin wollen und was die genau machen".

Au der Mackey hett mer gfalle wo gwartet hett ass em ain d Folie wytter druggt. Selbst ist der Mann...

Nochhär han y my mit der HSGF (also die an dären Uni wo au Hattrick spiile) im Spanische Klubhuus droffe. S Bier isch seer billig aber d Calamares bitz spärlig für der Pryys. Es hätt zwar e TV gha, aber y ha gfunden äntwäder me goot ans Träffen oder me luegt Färnsee. Jedefalls bin y denn per SMS ("Wenn die so wytter mache hool mer glaub kai neui Jooreskarte me...") uff em Laufende ghalte worde und won y der Färnsee denn doch na aagmacht ha isch das Gool gfalle. D Schadefreud nach däm Penalty han y denn erscht verkrafter noodäm verschosse worden isch. Dä nääbe miir isch jedefalls Zürcher und e grooooossen FCB-Fan. Der Hakan und der Streller hett är so toll gfunde, aber jetzt der Jimmy. Gärn wurd är au emoll ins Joggeli koo und nit immer nummen ans Zürcher Derby - y glaub de muess me moll zu de Downtowners schigge. "Ah jo, die spiile jo hüt, gäll...".

Bym 2342. Bier ha my denn no mit zwai Lozärner Gugge-Trompeter unterhalten und gfunde s syg jo schön ass sy Wasserfäll und so baue für iiren Umzug, aber seer politisch syg das nit. Die hänn denn gstuunt ass es au by uns vom Kommunischt bis zem Nazi alles hett und me DROTZDÄM ka öppis glatts uff d Bai stelle.