Allerlei rofliges

- Der Bieger zer Swiss isch gail gsii (sinngemäss): "S isch allerdings schon e komischi Loogik - wenn die usländische Carrier jo schyynbar alles besser können, no muess me sich froogen öb me denn nit aigentlig alles könnt uslaageren und worum s denn überhaupt die Swiss no bruucht."

- Hüt won y uss Gülle haikoo bi het mer der Brueder ganz stolz en Artiggel zaigt: http://www.cash.ch/newsview.php?print=yes&news_id=51072&kat_no=507

My Reaktion isch gsii: Das Ranking kenn y, das erschyynt jede Joor in der Bilanz - und gseet aigentlig normalerwyys zimlig anderscht us. E Bligg uff die zitiert Quälle het mer denn zaigt ass dail Journalischte nit PISA-tauglig wääre - v.a. könnt aim jo bym noochelääse vom aigene Geschraibsel komisch vorkoo ass d Ranglischte grad alphabetisch usfallt... (villicht hätt ers au uff Französisch und nit uff Dütsch sotten aaluege?)

[URL]http://www.swissup.com/r2k3_main.cfm?upid=DE[/URL] - y hoff me kunnt z Schlaag - diräggt verlingge goot irgendwie nit...

- Worum findet men aigentlig "Humankapital" sone schlimms Wort und muess es au no derfür usszaichne? Guet, me ka das als "Verunmenschlichung" verstoot, aber s Positiven an däm Aasatz isch doch ebbe grad, ass me d Mitarbaiter als entschaidendi Ressourcen aaluegt wo me muess pflägen, umsorgen und wytterentwiggle - und gege DAS ka me jo wool nit wirgligg öppis haa, oder?

Very impressed

Hüt han y en yydrügglige, aber au bitz wiidersprüchlige Maa erläbt. Der Peter Aliesch, wo de maischten aigentlig no als Medienopfer us em 01 bekannt sott syy (also quasi der Iebigsdummy vor em Fall Borer use em 02). Zwar hett er betont ass der Unterschiid halt isch als bym Tommy nit au no d Justiz involviert gsii isch sondern primär halt aifach Ringier sin d Parallelen interessant. Bsunders yydrügglig sinn folgendi Pünggt gsii:

- Schyynts syg d Konkurränz unter den ainzelnen SF DRS Sändegfäss grösser als extärn mit andere Medie bzw. Sänder. Kai Wunder wenn glyychzyttyg, d Daagesschau, s 10v0r10, d Rundschau und die regionalen aggduelle Schwyzer mitemen aigene Team unterwägg sinn. So will denn halt schnäll emoll der aint der ander mit sensationellen "Enthüllige" überdrumpfe.

- Der Maa haltet nit vyl vo der Zürcher Justiz und het das au zimlig düttlig zem Usdrugg brocht. Me het em jo vorgwoorfen är haig irgendsone fremdebollyzeyligy Erlaubnis erdailt für sy Griechische fründ. Derby isch die 1. Mee als 1 Joor bevor är dä überhaupt kennt het erdailt worden und 2. uff absolut illegaly Art und Wyys duur en Yygriff vo de Zürcher in bündner Verwaltigsakt verlengeret. Genau dä Bezirksaawalt vo nämmlig s Verfaare gfiert het und iim dä Aggd vorgworfe het, het nämmlig nit numme veraalaasst ass der Aliesch kai Zuegriff me uff die Akte gha het sondern au no sym Chefbeamte befoole, är söll d Bewilligung verlengere well är dä Griech ebben als Züüg wurd bruuche. Das erinneret my irgendwie fascht an e gwüsse Fall wo me Lüt zämmedryybt undene genau das denn vorwiirft - remember Alstetten.

- Irgendwie het my der Aliesch nit numme hypernervös (ganz entgege frieneren Uffdritt, z.B. in der Arena) dunggt, sonder fascht scho e brochene Maa. Är findet zwar är hegs überwunde, aber mii dunggt das het halt doch diefery Wunde hinterloo - mit vyle frienere "Fründe" het är bewusst kai Kontakt me und divärsi Aagebot zu Widerguetmachigsbricht vo Chefredaktore (v.a. ai Zyttschrift hegs gross welle bringe, y tipp uff d Wältwuche) het är abgläänt - lieber gar nümm in de Medie als dailwyys rehabilitiert. Kai Wunder, ass d Yystellig vom Verfaare sone grings Echo bikoo het.

- Die zueständig Redaggdoorin bym SoBli het me (Zitat) "entsorgt" - die schafft jetzt schyynts für TAMedia. Kai Wunder schrybt der Tagi gärn so vyl Schaizz.

- Är het zwar widerhoolt gsait me söll das nit als Verschwörigstheorie verstoo, aber gwüssi Kreft hänn halt schon e Rolle gspiilt. Im Kanton heg är sich halt au Fyynde gmacht well är so erfolgryych und unabhängig gsii syg (blöff...) - und bekannt isch är jo au gsii, s WEF het polarisiert. Au e gwüssy Yyflussryychy Ainzelperson by Ringier usem Umfäld vom Verleeger isch no aadöönt worde (wobyy dä schyynbar wider emoll nummen ych tscheggt ha...) - wider mol digg gsii, Frank A. Meyer. Sich immer als Guetmenscheprediger positioniere und denn all Joor Menschen unbegründet medial abschiesse. D Ringier-Präss isch halt scho verdammi hüüchlerisch.

Zum Abschluss no d Expression vom Daag: "Skandalisierte mediale Empörungsbewirtschaftung"

Abdeit

Nur zur Besänftigung vo der verzwyyflete grossen Aahängerschaft vo däre belangloose Sytte: s gitt se no und sy wird au wyttergfiert, villicht aifach nit soooo regelmässig. Wäärend de Feschtdääg isch halt aifach nüt verzellenswärts bassiert und das wo verzellenswärt isch wänn mer lieber nit so öffentlig diskutiere.

D Uni het jo mittlerwyyle wider aagfange. Als froogen Wääse sinn mer neui Sachen uffgfalle:

- Dä Typ im "Politik und Medien" isch e komische Siech. Drum bin y saustolz gsii won y e Namme für en gfunde ha: "Teutonentunte"! Allerdings bin y mer nit sicher ob das wirgligg e gueti Sach isch, me könnt en nämmlig jo au "Schwoobeschwuchtle" nenne. Y mach glaub en Urabstimmig...

- Übrigens isch glyy wider Vorfasnacht. Der total Overkill und s druurigen isch aigentlig ass mer mit em Drummeli aigentlig by der ödischte Veraastaltig vo däre Gattig mitmache. S Gueten isch aigentlig numme d Premièren und der letscht Samschtig: Broscht! Und denn Zobe nomol uff d Büüni und wyttermache. We are black, we are white, we are Staine Dynamite!

- Der Hilb isch aifach glatt. Nit numme der Akzänt, nai au syny "partizipativi" Bewärtigsmethode gfallt mer - aber s Highlight sinn definitiv syny "as well as" Wortschöpfige wie der Globalpreneur und so Züügs. Drotzdäm isches aigentlig gar nit so falsch was er verzellt.

- Pyynlig isch es für die Gruppe gsii wo vergässe het ass sy aigentlig öppis hätt sotte presentiere. Aber do isch our "guy from Appenzell" seer entgegekommend gsii. Me könnt en mit guetem Gwüssen als Guetmensch (woby die jo au vyl Saich schryybe - siehe der aggduelle Beobachter über "Altstette") bezaichne - sy Stakeholder-Theorie und au no anders isch scho fascht sozialistisch aaghuucht.