Bilder interpretiere

Im Föteli unte, wo wäärend em McKinsey-Boat-Trip-Event uff em Bodesee uffgnoo worden isch gseet me zewai Sache:

- Punggto "Positionierig" bestoot bi mir no Verbesserigspotential. Und dä doof Pulli uff de Schultere isch saudoof-pseudo-sophisticated. Me basst sich halt aa...

- Amis mien scho immer überall derbyy syy. Dä Typ rächts het zmindescht noch mim Wüssensstand nämmlig grad gar nüt mit em SIM z due, aber ebbe - het woorschyynlig gar nit tscheggt was abgoot. Potentielle Bresidänt.

- S het halt schone baar komischi Gstalte gha - y ha se drotzdäm alli gärn.

S f��le (fascht) numme d Nerds... 

Nostalgie

Zerscht emoll an der arbetswietig Dail vo der Gsamtbevölggerig: I GANG IN D FERIE! Und zwar uff Zypere nämmlig! Wäärend iir in euren Arbetsbungger wärdet schwitze bin ych am Chillen und Feschte. Jedes Mool wenn euch e Kund oder en IT-Fritz närvenderwyys vollaberet wärdet iir denn dängge: "Schaizze, der Tülli liggt jetzt am Strand und nimmt no ain..." Das isch jetzt zwar fyys, aber ych dörf das sage, well im Oggdober wird das jo glyych syy wenn iir in Gülle gmiegtli ain duure gänn und d Sek. "War was?" könnet uff iirer Büüni wo sich Realideet schimpft gniesse. Vo däm här han y jo fascht miesse bitz vermeert forciert vorhoole, au wenn das do in Balkonie au scho aagnääm isch.

Item: Jedefalls het my won y zem F. gloffe bi für e Session EyeToy und DVD grad e gwüsses Gfüül vo der Nostalige "übermannt". Der P. uss R. het das jo scho am Samschtig vor der Kupple gha, aber bi mir isch do offesichtlig e glaine time lag yybaut. Y ha mer denn dänggt wie glatt das doch amigs an dänen Oldie Nights etc. gsii isch - was natürlig völlige Blödsinn isch well maischtens isch dört nit wirgglig vyl uffbauend-erhaiternds gloffe, emoll abgsee vo den ewig glyyche Songs (guet, me ka halt au schlächt neui produziere oder Sache spiile wo kai Sau kennt). Das het also scho bitz öppis vom "d RS isch doch aigentlig au no luschtig gsii"-Survivor-Syndrome.
Was my wirgligg beluschtigt het isch aifach ass me so Saich wie amigs bim R. kuum me mache wird. Vyl glaine Feygling suffe, posiere (I know, die Dinger sinn wirgligg schlimm...), am Boden ummekrabble, "nänai, bi numme go saiche..." (jo eh, öbbe 30 Minute...) und hai wenns häll wird. S isch doch no glatt gsii, jetzt schimpft sich so Züüg halt aifach "Apéro"...

Komischi Jurischte...

Halt well dä Pouscht so guet aakoo isch, Sek. Recycling wider aggdyv:

Bussen für den FC Bisel und Super-GC

Die Senilitätskammer der Debilitätskommission der Swiss Funktionärs Lounge hat ihr Urteil zu den gravierenden Vorfällen etc. gefällt.

Der FCB hat sich zwar in Anbetracht der doch stark eingeschränkten Kompetenzen und Einflussmöglichkeiten alle erdenkliche Mühe gegeben, derartiges zu verhindern. Dass wir das schriftlich festhalten und im gleichen Atemzug eine massive Busse aussprechen ist zwar völlig sinnbefreit, aber im Laufe der Jahre haben wir uns derart daran gewöhnt, dass wir's schon richtig glatt finden. Ralph meinte was von 100, aber in einer geselligen Runde hat das Los dann auf 50 entschieden.

Der Veranstalter konnte die Sicherheit der Besucher nicht gewährleisten. Das wäre aber auch etwas viel verlangt, wenn man bedenkt dass er ja in grosser Regelmässigkeit mit den gleichen Leuten grossen Reibach machen kann. Damit das Ganze auch völlig ad absurdum geführt werden kann (wir haben da eben eine Wette mit dem Cortesi am Laufen, da muss einiges aufgeholt werden), lassen wir die Hoppers in Ruhe. Ach ja Peter: ich und Susi haben letzten Samstag in vollen Zügen genossen und die Flasche Wein mittlerweile schon kredenzt. Kommt doch auch ihr wieder 'mal vorbei. War einfach etwas unglücklich, dass einige der dank "Lex Landolt" im Stadion Weilenden eifrig mitgewirkt haben damals (Anmerkung: Diese Unterstellung entspringt der reinen Fantasie des Verfassers, werte StaWa), aber wir haben's ja jetzt auf die Basler gewälzt. Dass du die Deutschen Hools einfach gewähren lässt war okay - Rechnung an den DFB erfolgt demnächst, sollen ihre Jungs mal in den Griff kriegen. Ist ja unerhört!"

Biecheregge

Ass d Sektion Franggfurt nit muess darbe do e Byydrag zer Bildig:

Was y übrigens grad fertig glääse ha isch "I am Charlotte Simmons" vom Tom Wolfe. S het öppe 700 Sytte, wobyy me nach ca. 50 scho waiss wie das ussgoot. Erstuunligerwyys isch s Buech nie nass worden obwools vor Klischees nur so trieft. S gschyyde Landmaitlig (ych) kunnt an die Eliteuni (au ych) und isch dört ganz gschoggt was me mit em andere Gschlächt aus so ka dryybe, was denn sone Verbindigsbrueder au ussnutzt (ganz sicher NIT ych), derbyy gubtis dört aber au no dä Nerd wo sy aigentlig saunätt findet, aber s isch halt ebben e Nerd (scho wider eher ych). Und denn gits no dä Basketballspiiler (Ex-Ych) wo denn blötzlig au aafoot studiere und sy Stammblatz wider bikunnt well sii iin so beflüglet. Iiri Zimmernochbere isch natürlig e verwöönti Posh-Göre mitem obligate clash of cultures zwüsche den Eltere.

Soooone Saich, aber y has halt gschänggt bikoo. Hätt das sotten e Vorberaitig uff d Staate syy? Come on...

Momentan grad uff em Nachtdischli (alles bim U.S.-Amazon bstolle - die horrände Transportköschte sinn durch die diefere Bryyse bzw. durch d Nitexistänz in Europa vo däm Züüg wettgmacht worde):

- America. E Satire vo de Macher vo der "Daily Show with Jon Stewart" wo aigentlig uff Comedy Central lauft, aber am Samschtig amigs au uff CNN (was au der Grund isch worum ys no praggdisch nie gsee ha...). S goot um d Entwigglig vo der Demokratie, v.a. au halt in Bezug uff Amerika, wobyy me dört natürlig seer sälbschtkritisch isch. Uff en erschte Bligg eher saichti Unterhaltig, aber um d Finessen uusezfinde muess me scho bitz gnauer lääse und e gschichtlige Background ha (han y au nit immer wenns um d Revolution goot...).

- The tipping point.vom Malcolm Gladwell. Mittlerwyylen aigentlig schon e Klassiker und e Topseller. S goot drum ass sich au gueti Idee, positivi Entwigglyge oder Modetrends wie Epidemie verbraite und dass doderfür wenig Lüt e grossi Wirggig könne ha - durch positivi Mundpropagande bi guet vernetzte Lüt halt äänlig wie bi däne Stewards wo s HIV deftig verdailt hänn vor lutter wild ummevöögle. Y bi nonig so wytt dermit, aber au wenns nit wirgligg vyl neus dinn het isch d Lektüre no amüsant. Losst sich denn halt für vyles aawände (Marketing, Biribumper-Brief etc.) und isch drum woorschyynlig in de Staate so fancy, ass d Roots iir Album dernoo benennt hänn (bzw. halt ebbe nach däre Studie wos drum gangen isch ass ab 20% Aadail vo Afro-Amerikaner imme Viertel alli verboorte Wyysen abhaue).

Was y nonig aagfange ha:

- Inevitable Surprises vom Peter Schwartz. Dä Autor isch sone Zuekunfts-Szenarie-Fuzzi vo Harvard und well dä Maa vo Monitor gsait het das Züüg sig guet han y halt gfunden y will mer das au emoll aadue. Schliesslig muess me jo wüsse was d "thought leaders" vo mim Arbetgäber so main...

- Crimes against logic vom Jamie Whyte. Isch sicher au no glatt und drifft sich guet zer Ergänzig vom Rhetorik-Kürsli wo mer die letschte drey Samschtig (und drum halt au d Frytyg) klaut het.

- Freakanomics vom Steven Levitt isch vo der Präss au euphorisch uffgnoo worde. Dasch halt en Ökonom wo sich mit bitz unüblige Frooge beschäftigt, z.B. worum Drogedealer no dehai woone etc. Dorum sicher interessant und unterhaltsam.

Es darf gelesen werden!

E "bitz" "anderi" Lüt

S loont sich halt aifach wirgglig nit wenn men as Studänt scho am Morgen uffstoot!

Guet, aigentlig han y jo nit erscht sytt däm für Lüt mit Galgehumor wie mii scho (fascht) sauglatten SMS mitem korbflächterische Teggscht "Y muen üsi Verabredig vo morn absege. Schaffen am Open Air und muen unbedingt Vorschlaafe. Sorry!" gwüsst ass das Wucheänd dä Event isch wo gar nüm sone gails Lineupt het sytt the Killers uss fadeschyynyge Gründ (äänligkaite mit däm SMS sinn rain zuefällig!) abgsait hän. Und au bi der Schützegartebesichtigung (hihi, die mache kaini Fierige für unter 20 Lüt und denn dauche bi uns numme 7 Naasen uff drotz 22 Aamäldige...) isch das immer wider zur Sproch koo - dasch übrigens gsii bevor y mi zu däm alkfreye Schützegold ha überrede loo, was bsunders guet isch wenn me vorhär grad e Dunggels gha het.

Item: Jedefalls goot me hüt Morge go boschte und isch sau stolz scho vor de 10e usem Huus z koo. Am Baanhof hänn denn scho divärsischti Lüt campiert und das asiatische Bäärli isch ganz verschrogge gflüchtet. Vor der Migros hets denn 5 Security-Lüt gha - mir wärs wooler gsii wenn no ain vom Gsundhaitsamt oder e Luusunggle dört gstande wär. Innen isch me denn nit so entdüscht gsii ab em vyle Baseldütsch in däre Massen uss Matte, Schloofsegg und filzige Hoor, sondern ab der Daatsach ass nit die erwartet Internationali duur dä Konsumtämpel ghallt isch. Y waiss aber immer nonig öb men äggscht nümm an das Könzärtli dörf wenn me schone 2 uff em Rugge het. In däm Sinn: Fluetet das Gländ