Hurry, hurry, hurry - buy my rice and curry!

Well geschter im Kassesturz sone härzerwaichende Bricht ko isch wo zaigt het ass im böse Ryysmärt daatsächlig der Märt spiilt und die arme Lüt in Thailand nit vyl verdienen usser wenn der Briis durch Max Havelaar künschtlig hoch ghebt wird (Ineffiziänz und kaini Aaraiz rule!) het d Scheffyyköifere vom familiäre Huushaltsbetriib entschiiden ass sy jetzt au numme no die Körnli mit däm Siigel wott kaufe. Y hanere jetzt gsait y well doch nit inere kommunischte Kommune huusen, aber aigentlig isch das soziale Verhalte jo gar nit sone schlächti Sach - wär sy Gwüsse dermit ka beruige söll das numme mache.

Die grien Fee

Am Samschtig het me nöime der Match vo de Köbelis ("I'm gonna get you some nice crayons!" - "Klein Köbi hat seine Betreuer verloren. Bitte holen Sie ihn an der Trainerbank ab.") gluegt und derzue em Dränge vom Dan noochegää wo scho lang emoll dä Absinth het wellen usprobiere.

D Erfaarig isch denn au ainigermasse glatt gsii, denn me het aims Bsoffesyy nit aagsee aber sälber isch me scho ainigermasse belämmeret gsii und het sich irgendwelchi Naggeschmärzen und so yygreedet. ABER SUFFE KASCH DAS ZÜGS JETZT WIRGLIGG NIT! Gruusig isch numme der Vornamme, y glaub falls y je wider emoll e Schlugg vo däm Züüg sott schlugge muesses im Raame vomene komplizierte Rezäpt syy und nit numme mit standardmässig mit Wasser und Zugger.

Well unsere Hyperactiveman denn het welle sinn mer schliesslig no ind Stadt wytterzooge. Es söll jo Gaschtgäber gää wo amigs sogar no Schirm für d Gescht zur Verfiegig hänn - in däm Fall isches aber genau umgekeert gsii, aber immerhin sinn mer denn miteme halbe Schirm pro Person die Viertelstund z Fuess gange.

Pflotschnass het me sich denn in die erschtbescht Dönerbude gschleppt wo der Schryyber unfreywillig "mit alles" gsait het ooni aigentlig e völlig abglutschte Diss welle z bringe. S isch jedefalls e Fääler gsii well uff Olyyven und Gaissekääs könnt y aigentlig guet verzichte - y dängg me hets nochhär wenigschtens im ganze Joe's gschmeggt was y gässe ha. Uss Langwyyl het me sich denn im Schryybe vo dadaistische SMS betätigt, wobyy Setz wo men als Ufforderig zu Naturseggtorgie könnt interpretiere nit überall aakoo sinn. Uff "Hustensaft! sprach der Zeitgeist" sinn mer aber z Rächt stolz gsii.

Sonen Ooobe MUESS me klarerwyys im Joe's usklinge loo und fründligerwyys het men au der wyyblig Dail vom hart Kärn vo der Fame-Bewegig mittlerwyyle dört aane glotst, sunsch hätt mer aso ächt öppis gfäält. Wenigschens hett me der Muschti nit ins A1 gloo no han y mit iim no können über dä und sälle schnööde. Ass vorhär kurz erwäänti Persone denn zume Zyttpunggt wo sich s Änd scho massiv abzaichnet het unds wirgligg numm seer glatt gsii isch no iiri Nachtbüs hänn lo abfaare isch bedütend gsii - und ass mir denn gar nit gentlemanlike aifach nit die ganz Stund mitenen uff der Letscht gwartet hänn denn scho irgendwie wider Kult.

Elmi Hasler

Der Zürcher Stapi het jo zerscht welle d Basler Fans uffriefe doch uff Zi!rü an Match z koo aber denn woorschyyntlig tscheggt wie pyynlig das isch und uff "FCZ-Fans" uss Basel umgschwänggt.

Der Elmi isch jetzt sicher der gröscht in Züri wäg däm Sparwitz - do isch jo der verschissenscht Basler Schnitzelbangg no glatter ass das Nachtschattegwäggs. Das arrogante Getue immer massiv garniert mitere gsunde Portion Blödhait, ere Pryyse Minderwärtigkaitskompläx und paar Büschel Wältfremdhait erinneret irgendwie an Harry Hasler:

I bi de Kumpel-Elmi, hi
en super-coole Mega-Gei
Gfengnis, kchai Stadie - alls paletti
Zueschauer wott i au e Schwetti
Gfangni machi, s Esthi and Sunne
wohne tueni z Downtown unne
Grossstadtaction. Checkschen?
Gang uf d Gass mach d Basler nass
Parkiere uf em Trottoir,
diräkt vor de Flachpass-Bar.
Det hani de Hotz-Sven gmeetet -
Du, hänn d Basler völl böös greetet!
En Südkurve-Badhose-Drink mit Schickane -
i de Kurve grad mal sächs Fahne.
Aber d Tschitschi, die Geiss,
wird eifach nid heiss.
Dänn nimm i halt die zwootbeschti
und mäld mi bi de Esthi.

Oh Elmi, Schätzli
mir sind doch dini Spätzli
Oh, Elmi lad ois ii
und sperr ois dänn grad ii.
Ich bin de Kumpel-Elmi -
en ganz en lingge Schelmi.
Und bruuch ich PR grad,
bin ich für nüt mir z schad.

Aber id Stadie wetti
nur gäg die rotblau Schwetti -
die sind halt scho no gletti...
Bin stark im Business
han super Plän
mit Stadie for men -
aber vergiss es
da isch Schnee vo geschter
hüt bin i no Aakchündigungsmeschter
So we n i bin,
chöntsch mi grad sterilisiere
Nid we di andere Basler, die tolle
machet d Stadie glatt volle
Weisch werum:
Die sind nit so dumm.

Refrain
Oh Elmi super
die Bulle-Terror-Trooper
so blöd wie s roten Estherli
dasch glaub dis Schweschterli.

"Fenster zur Berufswelt"

Bevor das Ding do no äntgültig entschlummeret isches höggschti Zytt für en Update - in der Vergangehait wurds no vyl z verzelle gää, z.B. über d Fasnacht ("Gwunne!"), s JoggeliWeschtFescht ("Freaks"), etc. Doch mer wänn ys nit mit so Sachen uffhalten und in der Gegewart yystyyge.

Im Raame vom Presentiere vo der Uni an verschiidene Schuele isch hüt Münchestai an der Raye gsii. Die hänn sich wirgligg saumässig Mie gä und en Art Mäss organisiert wo 60 Referänte (Lüt wo aifach Brief an und für sich vorgstellt hänn aber ebben au FH's und Unis) dailgnoo hänn und s halt au none baar Ständ gha het. Jedefalls bin ych mitem Koordinator vo däne Bresendazione wo äggstra vo Schaffhuusen aagraist isch well sunsch kain(i) uss der Region Zytt gha het dört aane gange. Die ganz Sach erschwert het ass d Uni z fuul gsi isch uns gschyyds Material zur Verfiegig z stellen und mir nit hänn welle ganzi Stellwänd mitschlaife. Die anderen Institutione (FHBB, Basel, Fribourg, jä sogar Neueburg) hänn das bitz anderscht gsee - jä guet, s aint oder ander Gadget (Kuli oder so) hätte mer aigentlig au könne mitnää aber so hänn mer mit unserem beschaidenen Uffdritt (y ha denn aifach schüüch e Broschüren an die riisig Stellwand kläbt) wenigschtens s Klischee vom grosskotzige HSG'ler massivschtens broche.

Uffgrund vo de griene Broschüre (Corporate Identity rulez) hett men ys glaub hüffig au no mit däne vo der Schwyzer Hoochschuel für Landwirtschaft vo nääbedraa verwäägslet. Sy hänn en aigene Beamer und Schöggeli derbyy gha und völlig unschuldigi Lüt welle derzue verfiere sich em "MajorNutztierwissenschaften" z widme - Brief mit Zuekunft, who cares about WTO und so?

Au die baide Pädagoginnen hänn zwar relativ schnäll wider yypaggt, aber der generell guet Doon isch gsii ass me zu den andere gangen isch undene vorghüüchlet het was sii au füre tolli Ussbildig wurden aabiete. Nummen uns het me grundsätzlig gschnitte - villicht au well mer uff die Nummere verzichtet hänn und eerlig bliibe sinn indäm mer ys me für uns und der uszfüllend Report als das andere mindere Züügs interessiert hänn... ( ;-) )

Vyl loos isch aigentlig nit gsii, v.a. wäärend de Vordraagszytte. My Vordraag isch guet bsuecht gsii und au sunsch generell erfolgryych, vo däm här isch das scho rächt gsii (und y waiss jetzt ebben au ass dä Leerer by de Rumpler drummlet - und är wie s Logo vo der Stainen ussgseet). Mer hätte villicht daatsächli emoll sotten ins Leererzimmer goo, aber der Maa het halt numme vom Kaffi verzellt, d Gipfeli heter woorschyynlig sälber wellen ässe. S het komischi Lüt z beobachte gää - ai Schielere het grad der Schlitte mitgnoo (guet, me isch ufem Land, aber sooo wyyt isch d Kantonsgränze jo aigentlig au nit...), en anderi het wirgligg nummen e bessere Sagg aaghaa, d FHBB het zwai krassi Gangstaz gschiggt wo in irgendwelche Geometrie-Ordner bletteret hänn und sunsch ain uff grimmig gmacht hänn, d Uni Basel zwai ainigermasse gschyydi Exemplar und zwai uss der Sorte "Bio, Philo oder Psycho" wo hoffentlig kaini aasteggende Granggeten überdrayt hänn. Ai erwaggsene Tüp het e Bagge gha als öb en 20 Biine gstoche hätte - y waiss nit zu wäm er ghört het (wool Uni Basel), aber är het aifach generell bitz Freud an allem gha woner gsee het dunggts my. Villicht ernäärt är sich vo Liecht oder so.

Drum: Glatte Mikrokosmos bisches!